有誰不曾生過痱滋？這種口瘡劇痛難當之餘，長在牙肉表面會妨礙說話，若於舌頭出現則食不下嚥，影響工作、生活和情緒。早前港大牙醫學院的調查顯示，近半（ 47%）港人每半年生痱滋一次或以上，有人建議以擠壓或咬破方式擊退，但中西醫認為這樣做只會延長復元時間，嚴重者更可能會因口腔黏膜長期受損，引發細胞變異，形成癌症。
俗稱痱滋，是指以口腔的唇、頰、軟齶或齒齦等處的黏膜，發生單個或多個圓形或橢圓形潰瘍，表面覆蓋灰白或淡黃色的假膜潰瘍，內裏包含血水、血漿及細胞爆裂後的滲出物，周圍黏膜紅而微腫，局部灼痛為主要特徵，成因至今未明。
■ Rab強調若有方法治癒，都會去睇醫生。
談到生痱滋，年屆 20的大學生 Rab可以當專家了，「自我懂性時開始，就已有生痱滋呢個問題。」 Rab說兩種情況會令他生痱滋：進食時不慎咬損兩排牙齒間的牙肉，但更頻密的是在上下兩邊嘴唇「自然形成」，「反而條脷同脷底就好少！」出現情況有多頻密呢？數數手指，平均每隔三個星期便會有一粒新的痱滋出現，患處約要兩至三個星期復元，有數得計，舊的剛消退，新的就在另一邊出現，結果連續多年無間斷的生痱滋，情況已維持十多年了。他天生愛說話，這樣對他來說可是個大懲罰，亦影響工作：「之前做過 sales，若生痱滋時就會完全唔想講嘢，若遇啱上堂要做 presentation都幾困擾，有時連嘢都唔想食！」
缺維他命 C和 E
最嚴重的試過讀小學時患手足口病，口腔生近 20粒痱滋，幾乎整個口腔潰爛；就算輕度嚴重那次亦有 7至 8粒，有看醫生吧？「傷風感冒時睇醫生就順便問埋，醫生都係開咗痱滋膏畀我，黃黃哋色，搽上去有層薄膜包圍住，係無咁痛囉，但唔見得快啲好。」至於坊間最常用來擊退痱滋的西瓜霜和鹽他也試過，依舊沒用，反而阿叔贈送的蜂膠液，把三星期的治癒期縮短成個多星期。因多年來很少病痛，母親又不習慣看醫生，「佢話生痱滋無咩嘢，就沒讓我看！」習慣成自然，但痱滋的痛不會因習慣而減退，問他可知是甚麼原因經常生痱滋？「可能係遺傳啦，亦都可能係熱氣啦，因為我鍾意食辣，但有營養師話我係缺乏維他命 C同 E。」
熱氣疲勞引起
將 Rab的情況告訴註冊中醫師彭明慧，她嘗試按照 Rab提供的資料解釋：「可能係遺傳因素令佢先天稟賦不足，咁樣就會生痱滋生得好密。」至於跟飲食習慣都有關， Rab喜歡吃辣，平時吃飯也偏向多肉少菜，水果也不多吃，加上他又經常熬夜，「其實成日食刺激性調味品，好似辣椒、醋、薑、葱、八角、咖喱、煎炸食物、太過粗糙堅硬嘅食物等，都有機會令口腔受損，增加生痱滋嘅機會！」所以中醫角度認為，飲食不節導致體內燥熱，即一般人口中的「熱氣」、過度疲勞或工作壓力等都會引起痱滋。
■長時間進食太鹹太辣或太熱的食物，都會生痱滋。
但家庭醫生關嘉美就指，最普遍的生痱滋屬於「復發性口腔潰瘍」，但她說成因至今還沒確實。而免疫力疾病（又稱貝西氏病）是一種病因不明、以細小血管炎為病理基礎的疾病，病人會有持續復發口腔潰瘍、生殖器潰瘍和眼色素膜炎等問題。假如病人受真菌或病毒如念珠菌等感染，又或患性病亦會出現痱滋，「患愛滋病、梅毒等的人都會生痱滋，所以如果幫伴侶口交，另一半就好易出事。但千祈唔好以為所有爛口都屬於痱滋！」關醫生指，如果長時間生痱滋而沒改善，顯示有機會患上癌症，包括舌癌，實在駭人聽聞。她說，一般情況下痱滋患處大概介乎 1mm至 15mm大小，在一至兩個星期內就會癒合，「若你搽晒藥膏，又戒食所有酸辣鹹嘅食物，但痱滋仍無改善，就有可能係細胞突變，當然我唔能夠話生痱滋長時間唔好，就等於有 cancer。」但她強調，舌癌初期出現的病徵跟痱滋極為相似，難以分辨，「所以如果兩星期都唔好，就應該要去睇醫生做檢查。」
■口交可能會感染病毒致口腔潰爛。
想擊退痱滋，坊間流傳不少方法，最經典的是在痱滋患處灑鹽，或用鹽水漱口，但關嘉美認為兩者皆無效。「你個口腔已經受傷，仲要在上面灑鹽？」聽聞有人更會「以毒攻毒」又咬又擠，在激烈痛楚後，患處會變得毫無感覺，她認為絕對不能這樣做，「首先咁做只會令復元時間延長，另外，咬佢即係令佢再爛啲，有可能會引起其他細菌感染；你覺得佢唔痛係因為已經『痛過龍』，連感覺都麻木咗，所以唔係好嘅治療方法！長時間咁樣做就更會有可能生 cancer。」她解釋，因癌症基於細胞變異，經常刺激或衝擊口腔有可能會令細胞突變，所以最理想的處理方法是搽含類固醇的痱滋膏，像薄膜狀包圍患處讓其自然復元，服食四環素類抗生素亦有效用。中醫則認為，因西瓜霜的成份能促進黏膜再生，亦有清熱瀉火和消腫止痛作用，故可以使用，但對於先天體質不足的病者來說，成效有限；而用訶子、兩面針冲水漱口，或者直接在患處塗黃連粉一樣能解決痱滋問題。
■解決痱滋問題須注重均衡飲食。
西瓜霜~~咽喉類中藥，歷史悠久，早在二百多年前已有記載，古人稱為喉科聖藥。西瓜霜的傳統製法是將西瓜切開，放入中藥，再將瓜置入大瓦缸中，在陰凉通風處儲存。數月後缸壁外有絮狀白色結晶體，就是西瓜霜。此霜具清熱解毒，消腫止痛功效，用於口舌生瘡、牙齦腫痛或出血，輕度燙傷或創傷出血等。
痱滋出現原因
1.飲食不節，愛食辛辣肥厚之物，致缺乏維他命
2.思慮過度或肝鬱氣滯
3.月經來潮前後出現內分泌失調
4.先天稟賦不足（遺傳）
5.工作過勞或壓力大
6.煙酒過多
7.細菌及病毒感染如念珠菌、梅毒上口或患愛滋病等
8.生水痘或患手足口病
|
發表於 2010-7-19 09:10:35
收藏
分享